Сборник - Библия (на цсл. гражданским шрифтом)

• Название: Библия (на цсл. гражданским шрифтом)
• Автор: Сборник
• Жанр: Религия

---

Глава 31

1 И рече Господь к моисею, глаголя:

2 Отмсти месть сынов израилевых от мадианитов, и последи приложишися к людем своим.

3 И рече моисей к людем, глаголя: вооружите от вас мужы и ополчитеся пред Господем на мадиама, отдати отмщение от Господа мадиаму:

4 тысящу от племене и тысящу от племене, от всех племен сынов израилевых, послите ополчитися.

5 И сочтоша от тысящ израилевых, по тысящи от племене, дванадесять тысящ вооруженых на брань.

6 И посла я моисей тысящу от племене и тысящу от племене с силою их, и финееса сына елеазарова сына аарона жерца: и сосуды святыя, и трубы знаменныя в руках их.

7 И ополчишася на мадиама, якоже повеле Господь моисею, и избиша весь мужеск пол:

8 и царей мадиамских убиша вкупе с язвеными их, и евина и рокома, и сура и ура и ровока, пять царей мадиамлих: и валаама сына веорова убиша мечем с язвеными их:

9 и плениша жен мадиамлих и имения их, и скоты их и вся притяжания их, и силу их плениша:

10 и вся грады их, яже во обитаниих их, и веси их пожгоша огнем,

11 и взяша весь плен их и вся корысти их, от человека до скота:

12 и приведоша к моисею и ко елеазару жерцу и ко всем сыном израилевым плен и корысти и имение в полк, во аравоф моавль, иже есть у иордана при иерихоне.

13 И изыде моисей и елеазар жрец и вси князи сонма в сретение им вне полка.

14 И разгневася моисей на надзирателей силы, тысященачалников и стоначалников идущих от ополчения брани.

15 И рече им моисей: вскую жив остависте весь женск пол?

16 тыя бо быша сыном израилевым, по словеси валаамлю, еже отступити и презрети слово Господне фогора ради, и бысть язва в сонме Господни:

17 и ныне избийте всяк мужеск пол во всяком возрасте, и всяку жену, яже позна ложе мужеско, избийте:

18 и всяк возраст женск, яже не познаша ложа мужеска, живых оставите я:

19 и вы станите вне полка седмь дний: всяк убивый душу и прикоснувыйся убиеному да очистится в третий день и в день седмый, вы и плен ваш:

20 и всяку одежду, и всяк сосуд кожан, и всяко соделаное от козличины, и всяк сосуд древян очистите.

21 И рече елеазар жрец к мужем силы приходящым от ополчения ратнаго: сие оправдание закона, еже заповеда Господь моисею:

22 кроме сребра и злата, и меди и железа, и касситера и олова,

23 всяка вещь, яже пройдет сквозе огнь, и (огнем) очистится, но и водою очищения очистится: и вся, елика аще не пройдут сквозе огнь, да пройдут сквозе воду:

24 и исперите ризы вашя в день седмый, и очиститеся: и по сих внидете в полк.

25 И рече Господь к моисею, глаголя:

26 возмите сочисление корыстей плена от человека до скота, ты и елеазар жрец и князи отечеств сонма,

27 и разделите корысти между воины ходившими на брань и между всем сонмом,

28 и отлучите дань Господу от людий военных ходивших на брань, едину душу от пяти сот, от человек и от скотов, и от волов и от овец и от ослят,

29 и от половины их да возмете, и даси елеазару жерцу начатки Господни:

30 и от половины сынов израилевых да возмеши едино от пятидесяти человек, и от волов и от овец, и от ослят и от всех скотов, и даси я левитом, иже стрегут стражбы в скинии Господни.

31 И сотвори моисей и елеазар жрец, якоже повеле Господь моисею.

32 И бысть множество плена, егоже плениша мужи воинстии, от овец шесть сот седмьдесят пять тысящ,

33 и волов седмьдесят две тысящы,

34 и ослов шестьдесят едина тысяща,

35 и душ человеческих от женска полу, яже не познаша ложа мужеска, всех душ тридесять две тысящы:

36 и бысть половина часть ходивших на брань, от числа овец триста тридесять седмь тысящ и пять сот:

37 и бысть дань Господу от овец шесть сот седмьдесят пять:

38 и волов тридесять шесть тысящ, и дань Господу седмьдесят и два:

39 и ослов тридесять тысящ пять сот, и дань Господу шестьдесят един:

40 и душ человеческих шестьнадесять тысящ, и дань от сих Господу тридесять две души.

41 И даде моисей дань Господу, участие Божие елеазару жерцу, якоже повеле Господь моисею.

42 От половины сынов израилевых, ихже раздели моисей от мужей военных:

43 и бысть половина от сонма, от овец триста и тридесять седмь тысящ и пять сот:

44 и волов тридесять шесть тысящ:

45 ослов тридесять тысящ и пять сот:

46 и человечих душ шестьнадесять тысящ:

47 и взя моисей от половины сынов израилевых, едино от пятидесяти, от человек и от скотов, и даде я левитом стрегущым стражбы скинии Господни, якоже повеле Господь моисею.

48 И приидоша к моисею вси поставленнии над тысящами силы, тысященачалники и стоначалники,

49 и рекоша к моисею: отроцы твои взяша сочтение от мужей воинских, иже суть у нас, и никтоже погибе от них:

50 и принесохом дар Господу, муж еже обрете, сосуд злат и обручие, и гривну и перстень, и усерязи и чепь златую, умолити о нас пред Господем.

51 И взя моисей и елеазар жрец злато от них, всяк сосуд соделан.

52 И бысть всего злата участие, еже отлучися Господу, шестьнадесять тысящ и седмь сот и пятьдесят сикль от тысященачалников и от стоначалников.

53 И мужи воинстии плениша кийждо себе.

54 И взяша моисей и елеазар жрец злато от тысященачалников и от стоначалников и внесоша е в скинию свидения, в память сынов израилевых пред Господем.

Глава 32

1 И скота множество бяше сыном рувимлим и сыном гадовым, много зело. И видеша страну иазирову и страну галаадову, и бяше место, место скотно.

2 И пришедше сынове рувимли и сынове гадовы рекоша к моисею и ко елеазару жерцу и ко князем сонма, глаголюще:

3 атароф и девон, и иазир и намра, и есевон и елеали, и севама и навав и веан,

4 Земля, юже предаде Господь пред сыны израилевыми, земля скотопитателна есть, рабом же твоим скот есть.

5 И реша: аще обретохом благодать пред тобою, да дастся нам земля сия рабом твоим во одержание, и не преводи нас чрез иордан.

6 И рече моисей сыном гадовым и сыном рувимлим: братия вашя пойдут на брань, и вы ли сядете ту?

7 и вскую развращаете сердце сынов израилевых, не прейти на землю, юже дает Господь им?

8 не тако ли сотвориша отцы ваши, егда послах я от кадис-варни соглядати землю?

9 и взыдоша до дебри грезновныя, и соглядаша землю, и отвратиша сердце сынов израилевых, яко да не внидут в землю, юже даде им Господь?

10 И разгневася яростию Господь в день он и клятся, глаголя:

11 аще узрят человецы сии изшедшии из египта, от двадесяти лет и вышше, ведущии добро и зло, землю, еюже кляхся аврааму и исааку и иакову: не последоваша бо вслед мене,

12 точию халев сын иефонниин отлученный и иисус сын навин, яко последоваша вслед Господа.

13 И разгневася яростию Господь на израиля, и томи я в пустыни четыредесять лет, дондеже потребися весь род творящий злая пред Господем.

14 Се, востасте вместо отец ваших, сокрушение человек грешников, приложити еще к ярости гнева Господня на израиля:

15 яко отвратитеся от него, приложити еще оставити его в пустыни, и возбеззаконнуете на весь сонм сей.

16 И приидоша к нему и глаголаша: ограды овцам да соградим зде скотом своим, и грады имением нашым:

17 и мы вооружени пойдем на стражбу первии сыном израилевым, дондеже введем я в место их: и да вселятся имения наша во градех утвержденых ради живущих на земли:

18 не возвратимся в домы нашя, дондеже разделятся сынове израилтестии, кийждо в наследие свое:

19 и ктому не наследим в них об ону страну иордана и далее, яко прияхом жребия нашя сию страну иордана на востоки.

20 И рече к ним моисей: аще сотворите по словеси сему, аще вооружитеся пред Господем на брань,

21 и прейдет всяк оружник ваш иордан пред Господем на брань, дондеже потребится враг его от лица его,

22 и обладана будет земля пред Господем, и посем возвратитеся, и будете безвинни пред Господем и от израиля: и будет земля сия вам во одержание пред Господем:

23 аще же не сотворите тако, согрешите пред Господем, и увесте грех ваш, егда вас постигнут злая:

24 и соградите вы себе грады имению вашему и ограды скотом вашым: и исходящее из уст ваших сотворите.

25 И рекоша сынове рувимли и сынове гадовы к моисею, глаголюще: раби твои сотворят, якоже Господь наш повелел есть:

26 имение наше, и жены наши, и весь скот наш да будут во градех галаадовых:

27 раби же твои прейдут вси вооружени и уготовани пред Господем на брань, якоже глаголет Господь.

28 И пристави им моисей елеазара жерца и иисуса сына навина, и князи отечеств племен сынов израилевых.

29 И рече к ним моисей: аще прейдут сынове рувимли и сынове гадовы с вами чрез иордан, всяк вооружен на брань пред Господем, и обладаете землею пред собою, и дадите им землю галаадову во одержание.

30 Аще ли не прейдут вооружени с вами на брань пред Господем, то предпослите имение их и жены их и скоты их прежде вас на землю ханааню, и да наследят купно с вами в земли ханаани.