Никон - ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы

• Название: ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы
• Автор: Никон
• Жанр: Религия

---

О прочих же святых бегающих вселетныя книги прочти памяти их, тамо известно увеси, како бегали и от какия злобы.

Тии же митрополиты и архиепископы обещалися во всем последовати и повиноватися Вселенским святейшим патриархом и по них и нам, отцу своему, еже и по нас бывающим благоволением Божиим святейшим патриархом. И не сотворити им ничто же по нужди ни от царя и великаго князя, ни от бояр или от князей многих, ни от множества народа, аще и смертию воспретят или служити велят или святительское творити в чюжей ми(л. 220 об.)трополии [821] во всех властех кроме епархии, данныя ми отцем моим, или отшедшу ми в которую страну чюжую, не действовати ми священная без позволения отца моего. Еще же и на том обещеваюся, внегда позвати мя отцу моему и всему священному собору, без всякаго слова приходити на собор. Еще же и на том обещеваюся, хотя мя князи держати или бояре или множество народа, не ослушати ми ся повеления отца моего и всясвященнаго собора и еже по них бывающих святейших патриархов. Еще же и на том обещеваюся, не хотети ми приимати инаго патриарха, развее святыя Восточныя (л. 221) [822] церкви греческаго закона по божественным священным апостолским правилом и по святых Вселенских седми соборов. Аще ли же сотворю что тако вышеписанных без повеления и без грамоты или преступлю что едино от сих всех написанных зде, лишен буду сана своего без всякаго слова.

Видел ли еси, каково обещание дали перд Богом и святыми Его ангелы и пред всем священным собором и пред государем царем и пред всем сигклитом и множеством народа? Что же сохранили? Ничто же, во всем солгали. Обещалися последовати святейшим Вселенским патриархом, Вселенския па(л. 221 об.)триархи [823] на Москве патриарш престол утвердили быти по правилом святых апостол и святых отец и яко главу всем почитати указали, и без того воли ничто же не творити, и по смерти инаго избирати. Тии же чрез их утвержение, не испытав о нашем отшествии, сошедшеся по царьским грамотам, собор составили чрез правила святых апостол и святых отец седми Вселенских соборов, якоже свидетельствует беззаконное их деяние, яко ничто же есть от апостолских или святых отцов правил, но от инех неких списано, чрез седмаго Вселенскаго собора перваго правила утвержение. И того ради (л. 222) [824] повинни вси святых апостол и святых отец правилом и Вселенских патриархов утвержение и своему обещанию.

Нигде, ни в которых правилех не обретается митрополитом митрополита судити, развее епископа и не менее 12, тии же новое беззаконие собором своим сотворили и на патриарха суд изнесли.

Во обещании их написано: и не сотворити им ничто же по нужди царя и великаго князя, ни от бояр или от князей многих, ни от множества народа, аще и смертию претят, веляще служити или святительское творити, кроме данныя им епархии. И то ведомо и самому государю царю и всем (л. 222 об.) [825] князем и бояром, понеже пред царем и всем сигклитом такое исповедание бывает, ниже царю государю лепо по них грамоты для такова дела посылати.

Собора, иже во Антиохии, правило 11.

Епископ или презвитер или диакон, сам о себе к царю приходя без повеления сущаго во области митрополита, с причащением сана да отпадет.

Толкование.

Непокорство во всем святии отцы измещуще и благочиние соблюдающе, возбраняют епископом и презвитером и инем священническаго чина без повеления и без писания митрополита своего к царю отходити или слухома его стужати и возвещати (л. 223) [826] о неких вещех. И того ради без воли митрополита своего отходящаго епископа ко царю или презвитера и от сана изврещи повелевает и от причащения упразднити.

Правило 12.

Извержен быв от сана, аще пристужает цареви, возвещая о себе, да просит к болшему собору приступити и судитися. И каков суд тии изнесут нань, в том да пребывает, аще же и потом противу глаголет, да не имать оправдания.

Толкование.

Аще который епископ или презвитер или диакон, извержен быв от сана собором, и мнит, яко без правды извержен бысть, се правило не возбраняет, но паче повелевает (л. 223 об.) [827] ему к болшему собору приступити и судитися и от того исправитись, в них же мнится прав быти на превращение изнесеннаго нань суда от собора того. Аще не хощет приступити к болшему собору, ни пред ним исправити, в них же творится прав быти, но царьскима слухома стужает, подвизая того на отмщение, се правило таковаго никоея же милости сподобляет, ни места ответу не дает ему, ни надеждею чаяти, яко будет исправление.

Инако же ко царю не приходити, развее обиды ради церковных и заступления ради сирот и вдов. Но и се с разсмотрением инех епископов.

(л. 224) [828] Собора в средце правило 8.

Аще [829] сирота или вдовица, в коей напасти нуждею страждущи, и помолятся епископу помощи им, да дерзнет епископ и приступит к цареви и молится, елико может, да помилует их, но да не изветом тоя вины пребудет долго время в воех, но паче диакона да посылает.

Правило 9-е.

Прибегающим в церковь да помогают.

Толкование.

Иже убо заступати сироты и вдовицы и печалныя утешати и в напастех нужду приемлющих помогати епископи должни суть. Такоже и в церковь прибегающим своих ради прегрешений и требующим милости, приходити их (л. 224 об) [830] ради к цареви и молитися о них ему, да мстит обидимыя и да простит осужденныя неких ради вин и прегрешений, се правило тако повелевает епископом. Таковых же ради вин не оставляти им надолзе своих церквей и не ходити в онех долго время или инде, идеже царь есть, и стужати ему о них, яко наводящу сего ради епископом порок и оклеветание не прощает тому быти правило, но своим диаконом молба посылати цареви повелевает.

И собора Карфагенскаго правило 104.

Людскаго [831] суда у царя просяй, не епископ.

Толкование.

Епископ или причетник, (л. 225) [832] о гресех оклеветаем, и отрицается церковнаго судища и просит от царя мирских судей, таковый своея чести да будет лишен.

Правило 106.

Некия ради нужды хотя ко цареви отъити, да яве сия сотворит Халкидонскому епископу и Римскому и отпустное послание да возмет. Аще ли ни, без общения есть.

Толкование.

Епископ или причетник, аще возхощет пойти к цареви, да скажет первое вину Халкидонскому епископу, ея же ради идет и возмет от него грамоту отпустную, и в Рим пришед, покажет ю епископу Римскому, и да явит ему вину, ея же ради идет к цареви. И той да разсудит, (л. 225 об.) [833] и аще будет подобна вина, да возмет от того грамоту, ею же от царя приимет помощь. Аще же кто от епископ или от причетник инако к цареви отъидет, да будет без общения, сиречь да отлучится. И о сем ищи правило 11-е Антиохийскаго собора и 9-е правило в средце собора.

И того ради повинни вси сим святым правилом и своему обещанию. И сбыстся на них писание, глаголющее: И [834] не восхоте благоговения и удалится от него. И прочее.

Паки глаголеши, ответотворче: Всем на Страшной недели ради спасителныя страсти Избавителю нашему все есмы кручинны и слезны, (л. 226) [835] показующе явный лицем внутренюю печаль, сопротивно во Святое Воскресение во светлыя ризы облачимся и веселимся. И кто на тот день не возвеселился Церковию Божиею, того сущим христианином не почитаем для того, что не радуется с Невестою Христовою, которая изнову увидела возлюбленнаго Мужа своего Христа. Для того наша вся кручина есть, для вдовства и разлучения Церкви Божии. Радость бы наша была вся, есть ли бы сложила платье печали Церковь Божия, Матка наша, и облеклась в светлое и белое платье. Овдовел есть престол патриаршеский, потому что един как отрекание учинил, почитается за мертваго (л. 226 об.) [836] человека, убо желает имети мужа своего, что потом и докуль будет жити в печали и докуль в том платье слезном будет безутешно. Муж, который оставляет жену свою чрез четыре лета, никакова радения о ней не имеет и харчем ей не промышляет, произволяет правило, чтоб инаго мужа была жена. Како же не может взяти инаго мужа Церковь Божия, когда Никон, что живой погребен, никакова радения об Ней не имеет, ни Ея питает.

Послушай, ответотворче. Писано есть. Грешнику рече Бог: Вскую ты поведаеши оправдания Моя и восприемлеши (л. 227) [837] завет Мой усты твоими, ты же возненавиде наказание и отверже словеса Моя вспять.

Господу глаголющу: Не слышателие закону праведни но творцы. Ияков апостол пишет: Аще кто слышатель, а не творец, таковый уподобися мужу смотрящу лице бытия своего в зерцале, усмотрив, и отъиде, абие забыв, каков бе. Посмотри о себе праведно, каков еси, якоже Господь повеле: Иже без греха, вверзи камень на ню. Глаголеши, вся наша кручина для того есть, для вдовства и разлучения Церкви Божия. О сей ли глаголеши Церкви? Почто сам о себе не усмотрел праведное, оставя волею свою Церковь и скитаешися всюду (л. 227 об.) [838] чрез Божественыя законы. Правила тех измещут, которыя без вины отходя, скитаются и не радеют о своих церквах, якоже множицею выше сего изъявихом. А еже о изгнаных без правды от церквей и отходящих от своего предела собора в средце правило 19.