Корнилий Комельский - Общежительный устав

• Название: Общежительный устав
• Автор: Корнилий Комельский
• Жанр: Религия

Общежительный устав преподобного Корнилия Комельского.

Приводится по изданию: Древнерусские иноческие уставы. Сост. Суздальцева Т. В. М. Северный паломник, 2001. С. 168–186

Источник электронной публикации — http://www.sedmitza.ru/lib/index.html

---

Глава 15. О исходящих из монастыря и паки возвращающихся братиях наших

Такожде и о братии нашей иже от нас постригшихся, и от монастыря изшедших аще по смерти моей приидут к вам со смирением и хотят сожительствовати с вами по преданию яко же написахом вам от Святых Писаний, приемлите таковых, яко свой уд. Аще который некое стяжание, или вещь имать, и ему того у себе, ниже инде где в соблюдение себе не держати, но вся возвестити Настоятелю и братиям воображенным на то. Они же сотворят о сем, яко же разсудят во благое; аще ли будет икона, или книга, и он возвестит Настоятелю и держит у себе за монастырское. Аще ли у него явятся кия вещи после; и хощет их у себе держати без повеления Игумена и братии, ино ему не попустити того держати, но возбраняти. Аще ли не исправится, но на горшее успевает, таковаго от монастыря изгоните, слышах бо аз, иже от мене постригшихся многих глаголющих: «Ныне нам Корнилий возбраняет и не дает по свей воли пожити, а егда умрет, и мы прейдем в свой монастырь и по воли нашей поживем якоже хощем». И вы, братие, таковых бойтеся и не принимайте их в монастырь. Ибо не хотят они жити по преданию, яко же написах вам от Святых Писаний, но по своей воли. Аще ли вогнездятся лицемерием в монастырь, и начнут свою волю составляти, вы же таковых скоро из монастыря изжените, донеле же не яко решится злоба, да не разорят устава и чина места сего, еже написана предах от Святаго Писания. Бог милосердый да покрыет ны от сети лукаваго, и наставит всех нас на путь истинный молитвами Богородицы и всех Святых. Аминь.