Никон - ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы

• Название: ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы
• Автор: Никон
• Жанр: Религия

---

Зри, ныне бываемое, аще и чрез Божественыя правила собора, иже в Карфагене, правило 7 и 43. Еже царие наши по своей воли священником исповедаются, а не архиереом, и от них во всех своих гресех суд приемлют и запрещение и их же хотят каковых любо грехов тяжких связати, яко связани мнятся быти, и их же разрешат, яко разрешени мнятся. Увы, яко (л. 992) [1608] и у Бога не разрешени суть. Тем же слезити и плакати, и не просто плакати, но и рыдати над ходитми, яко погибель таковии идут, ибо единем архиереом таковая власть дадеся от Господа, еже вязати и решити грехи, а не просто и священником. Якоже воследование в молитвословии показуется, но обаче аще и от обычая таковое самочиние привниде, и терпят царие и князи священническое запрещение и разрешение, правду мнят быти, колми паче подобает архиереов слушати, а не судити. О них же Господь рече: Слушаяй вас, Мене слушает, и отметаяйся вас, Мене отметается. (л. 992 об.) [1609] И аще не слушаяй и отметаяйся вас, Мене отметается, рече Господь. А иже кто дерзает судити несудимаго колми паче неистовится на Господа. Тем же к таковым Господь з запрещением глаголет: Не [1610] судите, да не судими будете, им же бо судом судите, осудитеся, то есть, якоже вы Мой суд неправедно восхитисте, не даный вам, царие и князи, и вознеистовистеся на рабов Моих, архиереов и прочих священнаго чина, и неправедно осудисте, Аз вас праведно осужду, по делом вашим. Тем же и наводит, глаголя, аки уча и запрещая: Не [1611] судите и не осудитеся, не осуждайте, и не осуждени будете. Такожде (л. 993) [1612] и божественный апостол Павел засвидетельствует, глаголя: Тем [1613] же не прежде времени судите, дондеже приидет Господь, иже просветит тайная тмы и явит советы сердечныя. И тогда похвала будет коемуждо от Бога. И паки глаголет: Ты [1614] кто еси, судяй чюждему рабу, своему Господеви стоит или падает, станет же, силен бо есть Бог возставити его. И паки: Что имаши, еже не приял еси. А кой же хотящим судитися пред мирскими судиами от священнаго чина, коего любо суть, апостол завещает, сице глаголя: Смеет [1615] ли кто вещь имея ко иному судитися о неправедных, а не о святых, или не весте, яко (л. 993 об.) [1616] святии миру судят.

Зриши ли, совопросниче, яко и тогда мирови [1617] хотят судити, како ныне хощеши тем судити, или како кто стерпит судим быти, им же сам хощет судити, будут же судити не сами седяще и слово истязующе, но осудят. Сие убо являя, глаголаше: И аще вами суд приемлет мир, не достойни есте судищем худым. Вещь, рече, вам приносит срам и уничижение неизглаголанно, понеже подобно им бе, от внутрених судимым срамлятися. Противное убо есть срам, рече, егда от внешних судитеся, оная бо судища наихуждшая есть, не сия, (л. 994) [1618] не весте ли, яко ангелом судити будем, и не точию житейским.

Зриши ли преизлишество чести священства, еже рече Павел, яко и ангелом судити хощем, а не точию житейским. Како мощно святым от житейских суд прияти? Тем же и навед, рече: Житейская убо судилища аще имате, уничиженых в церкви, сих посаждаете и сраму вам глаголю. Тако ли ни един в вас мудр, иже может разсудити между братий своих. Сие глаголет: Аще кто возглаголет, яко ни един в вас мудр, ниже доволен разсудити, удобь небрегоми вси. И что сие? Аще и ни един есть, рече, мудр, (л. 994 об.) [1619] остави и не мудрым по власти и достоянию судити, да не срам обоим будет, еже овому судити, житейскому глаголю, овому от житейскаго судитися.

Всех святых апостол правило 1.

Койждо [1620] в даном ему чину да пребывает и не преступает заповедей, не суть бо наша, но Божия, якоже рече Господь: Слушаяй [1621] вас, Мене слушает, и слушаяй Мене, слушает пославшаго Мя, и вас отметаяйся, Мене отметается, и Мене отметаяйся, отмещет пославшаго Мя.

Святых отец собора, иже в Халкидоне, правило 39.

Причетницы [1622] между собою распрю имуще, аще оставлше епископа к мирским судиям (л. 995) [1623] приступят, по правилом вину да приимут. Причетницы же, аще имеют что на епископа, да ожидают собора, аще же епископи на митрополита Константиняграда патриарху да возвестят.

Толкование.

Аще причетницы имать что на причетника, не подобает ему судитися пред мирскими судиами, но от своего епископа. Аще же оставлше своего епископа, к мирскому судищу приступят, по правилом запрещение да приимут. Такожде и причетник, аще имать нечто на своего епископа, да приходит к митрополиту страны тоя, егда в реченое время соберутся к митрополиту всея области его епископи, (л. 995 об.) [1624] тогда пред митрополитом на соборе да судится. Аще ли епископ или причетник с митрополитом имать некую распрю, от патриарха всея тоя земли да судится, под ним же суть епископи и митрополиты всех областей страны тоя, или от патриарха Константиняграда судится. Сия бо власть никому же от инех патриарх дана бысть, ни от правил, ни от закона, еже судити митрополита, под инем патриархом суща, другому патриарху, но токмо Константиняграда патриарху сие дано есть.

Святых отец собора, иже в Карфагене, правило 15.

Епископи [1625] или презвитери или диа(л. 996)кони [1626] в греховных вещех оклеветаеми суще, аще оставлше церковныя суды и к мирским судиам прибегнут и осуждени будут, свой чин погубят. Аще же и оправдани бывше градским судом, иже тому приложившеся, свой погубят чин. Судии же церковныя, аще не обличени будут по милости или по мзде или по вражде или прежде отгнани собором бывше, да не противятся. Аще же обе стране изберета судию, суда их да не преступят.

Толкование.

Епископом и презвитером и диаконом не подобает отрицатись церковнаго судища. Аще ли кто от них оклеветаем о гресе, церковный (л. 996 об.) [1627] оставит суд и ко градским судиам приступит и пред теми исповесть вину и судится. И аще неповинен явится и осужден будет от градских судей, свой погубит степень. Аще же не о гресех будет нань вина, но о имении или о злате или о неких мирских вещех, и прилучится ему о таковых препрети и оправдану быти, подобно ему судище церковное оставлшу и к мирским судиам приступлшу, и от тех судившуся, аще убо хощет тех суд держати и вопросит имения или злата или инаго что, о нем же, препрев, оправдан бысть, свой степень (л. 997) [1628] погубит. Аще же преобидев мирский суд и не возмет, ни вопросит ничто же, о них же оправдан бысть, во своем степени да пребывает. Аще же кто от епископ осужден, и осужден быв от них, к болшим церковным судиам возглаголет на тех, иже осудиша его первое, аще не будут отлучени, или по гневу, или по любви, или по некоей мзде суд сотворше, в том суде осужденый да пребывает, и елико от повинных епископ и причетник, аще же оба суперника, и оклеветаемый, и оклеветаяй, оба избереста церковныя судии и восхощета судитися пред ними, аще и мне их есть. (л. 997 об.) [1629] Епископа убо оклеветаема дванадесят епископа судита, презвитера ж шесть епископ и седмый свой ему, и диакона трие и четвертый свой ему епископ, якоже во втором на десять правиле сего собора написахом, судивша же ся пред ними и осуждена бывша, не имата како на суд их припадати, но пребывати в том, якоже тии судиша и собор исправляет невежество или неправду судии, како убо прият будет, иже сам избрав церковныя судии, и словом и делом непорочны глаголя. И по сем паки глаголет, яко не добре, ни по правде осужден бых от них, или ино некое поречение нанося на священныя мужи, их же сам избра.

(л. 998) [1630] Того же святаго собора правило 104.

Людскаго [1631] суда у царя просяй, не епископ.

Толкование.

Епископ или причетник о гресех оклеветаем и отрицается церковнаго судища и просит от царя мирских судей, таковый своея чести да будет лишен.

Григория Богослова о Святем Афанасии слово 13 стих 22. Толкование.

Где скверному соборищу с простыми людьми судяху преподобныя епископы и жития их беззаконно истязоваху, како бо рещи небеззаконно, еже епископская дела пред всеми истязати и смешати несмесная и пред внешними людьми о тайных вещех вопрошати. Иереом бо лепо от епископ судитися, а не от внешних судей, (л. 998 об.) [1632] епископом же самем межи собою, а не пред людми. Они же нечестивии осуждающе и великаго Афанасия, якоже прежде о руце, тако и паки некто глаголаше нань, облыгая, яко по воли его святую трапезу испроверже и потир разби и ина таковая тайная пред людми испытанию быти устроиша. Не бо истина бе, но клеветники наяша, обещаша дати им мзду доволну, аще от вашея клеветы осудятся судимии епископи. И последованием таковых клевет благочестивии святителие от церквей изреваеми бываху, вместо ж их вводими нечестивии. Тии же просими бяху рукописания нечестия и пишущии таковая предстояху и (л. 999) [1633] чернило готово. И от сего мнози и от правоверных прелстишася в таково написание злочестия, заеже не отпасти от престола. Аще ли же лепо есть и вины сих рещи, ими ж нечестию подклонишася, обретаю четыре. Первое страхом нецыи смущени бывше. Второе же, яко имением нецыи порабощаются, прелстившеся, и предают истину на лжу. Третие же, яко и ласканием не утвержени прелщаются. Четвертое ж и хуждьшее, или неразумием окрадаеми бывают нецыи, обаче аще и предложат таковое во ответ святители, глаголюще, яко не разумели есмы, но не будет им от сего нимало ползы. Простейшим бо (л. 999 об.) [1634] довлеет таковое рещи, не доведущим Божественаго писания, людин бо простый се пострадав неведением, малу милость получит. Учителем же како не безместно се рещи, иже и других неведения исправляти вчинившихся, ни закон греческий, якоже мню не весть кто, аще и от грубейших будет зело и неученых, яко николи же помогает злотворящим за невежствие. Аще быша и тмами во ответ предложили когда таковое, спасения таиноводцем, церковным началником, епископом, не ведети всего спасения начала, еже о Христе благочестие и вера святых апостол и святых отец предания Церкви. Аще (л. 1000) [1635] и во иных будут прости и не глубоцы разумом, обаче буди мало во ответ, по моему бо слову, иже от неведения последствовавшим нечестию, что, рече, хощем рещи от других, елицы и разумом остри суще и мудрость в смысле имуще, и прелщени вин ради предреченых властелем в нечестие повинушася. О сей страсти аз многащи плаках зря излияшееся нечестие на мнозе и воздвигшееся гонение на иже праваго слова сущих от неистинных представник слова, но лукавых. Мнимых убо пастырей быти Христову стаду, делом же волков поистине и губителей стаду. О таковых бо рещи со пророком Иеремием: Поистине (л. 1000 об.) [1636] яко пастырей изумишася. И паки: Пастырие мнози растлиша виноград Мой и часть желанную посрамиша, Церковь Господню глаголю, собраную и украшеную многими подвиги и закланми, еже прежде Христа, глаголю, пророки и проповедники и по Христе апостоли и мученик множества, над всеми же сими великими еже о нас самаго Христа страстьми.