Никон - ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы

• Название: ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы
• Автор: Никон
• Жанр: Религия

---

Послушай, суемудре, и безумных безумнее, аз ти покажу о суде на митрополитов и архиепископов и епископов и попов и дьяконов (л. 782) [3236] и на прочих причетников, яко не точию простым людем достойно есть судити митрополитов или архиепископов и епископов, но един митрополит архиепископу или епископу не может судити. Такожде и един архиепископ или епископ не может судити попу и диакону.

Святых апостол правил 74.

Оклеветаем [3237] епископ и позываем на суд, и не послушая дващи и трищи, двема епископома да позван будет. Аще же не приидет, якоже хощет, собор да осудит таковаго.

Толкование.

Оклеветаема епископа о некоем прегрешении от достоверных мужей и позываема на судище и (л. 782 об.) [3238] не послушающу, не тако вскоре подобает собору осудити таковаго, но и дващи и трищи позвати того, и да посылается по нь на коемждо позвании по два епископа. Аще же пребудет небрегий и не приидет на судище, да испытает вину по единей части собор и по подобию вины достойно да осудят его. Да не мнится избыти [3239] суда беганием.

Святаго Карфагенскаго сбора правило 12.

Епископа [3240], в некоей вине суща, аще не весь собор области тоя, обаче дванадесять епископ да судят. Презвитера же шесть и диакона трие.

Толкование.

Аще ли на епископа будет клевета о коем (л. 783) [3241] любо гресе, подобает всея области епископом судити того собором. Аще ли несть мощно всем снитися, обаче дванадесять епископ да судят, меньше же сего да не будет. Презвитера же о гресе оклеветаема, им же есть конечное извержение, шесть епископ да судят, седмый же свой ему епископ. Диакона же три епископи и свой ему четвертый. И тако истязаются вины их и судими бывают.

Того же святаго собора правило 20.

Презвитеру [3242] оклеветаему ближних епископ 6 и сего седмый да разсмотрят о нем, диакона же три и 4-й свой ему да судят, (л. 783 об.) [3243] прочая же причетники и сам един да истяжет.

Толкование.

Се речено есть и во 12-м правиле сего собора, аще некая клевета будет на презвитера, шесть епископ да судят ему, и свой ему с ними епископ да будет сразсмотритель. Диакона же трие да судят, и четвертый свой ему епископ. Прочии же вси причетницы, ниже сущии от диакон, и от единаго своего епископа да судятся, оних же гресех оклеветаеми бывают.

Того ж святаго собора правило 108.

Един [3244] епископ своим судом да не отмстит.

Толкование.

Не токмо единаго епископа суд не довлеет, но и двою не довлеет (л. 784) [3245] на извержение презвитера или диакона. Но аще убо есть епископ оклеветаемый, аще несть мощно всем снитися епископом, не менше от двунадесяти епископов да судится. Аще же презвитер, от шести епископ и седмый свой ему, аще ли диакон, от триех епископ и четвертый свой ему. И тако о извержении судими да бывают.

Якоже 12 правило и 20 сего собора повелевает: Да не поставит убо себе судию един епископ на извержение презвитера или диакона, и своего суда разумом в дело се да не изведет, рекше, сам един да не извержет. Аще же есть ины причетники судими, (л. 784 об.) [3246] мнии честию суще от диакона, на таковых власть имать судити един места того епископ, якоже на конце 20-го правила сего собора повелевает.

О Агапии и Гавадии глава 16, правило.

Не [3247] подобает по сем ни от двою, ни от триех и о греховней вине судиму епископу извержену быти, но множайшаго собора разсудом, ту сущу и митрополиту, якоже и апостолская правила повелеша.

Толкование.

Понеже отци сего собора обретоша епископа Вострьскаго Гевадиа, от двою епископу извержена бывша от сана, и в его место Агапиа по(л. 785)ставлена [3248] бывша епископом, убоявшеся, да не будет потом напоследок таковое дело, хотящее быти, утвердиша и повелеша, оклеветаему сущу епископу о гресех и дошедшу ко извержению, не от двою или от триех епископ судиму быти, но аще есть мощно от всех сущих во области епископ. Аще ли ни, поне от многих, якоже да не будет число менше двунадесять епископ, якоже и второенадесять правило в средце собора сказует.

Святаго 4-го Вселенскаго собора правило 9.

Причетницы между собою распрю имуще, аще оставльше своего епископа, к мирским (л. 785 об.) [3249] судиям приступят, по правилом вину да приимут, причетницы же, аще имеют что на епископа, да ожидают собора. Аще же епископи на митрополита Константиняграда патриарху да возвестят.

Толкование.

Аще причетник имать нечто на причетника, не подобает ему судитися пред мирскими судиами, но от своего епископа. Аще же оставльше своего епископа к мирскому судищу приступят, по правилом запрещение да приимут. Такоже и причетник, аще имать нечто на своего епископа, да приходит к митрополиту страны тоя, егда в реченое время (л. 786) [3250] соберутся к митрополиту всея области его епископи, тогда пред митрополитом на соборе да судится. Аще ли епископ или причетник с митрополитом имать некую распрю, от патриарха всея тоя земли да судится. Под ним же суть епископи и митрополити всех областей страны тоя или от патриарха Константиняграда судится. Сия бо власть никому же от инех патриарх дана бысть, ни от правил, ни от закона, еже судити митрополита, под инем патриархом суща, другому патриарху, но токмо Константиняграда патриарху сие дано есть.

(л. 786 об.) [3251] От свитка новых заповедей Иустиниана царя глава 57.

Аще [3252] нецыи преподобнии епископи того же собора, рекше от единыя области, распрю некую имеют друг к другу или о церковных местех, или о иных неких вещех, первое митрополит их с другими епископы от своего собора таковую вещь да судит. И аще не пребудета оба суперника в сужденых, тогда преблаженный патриарх того правления между ими да разслушает и тако да повелит, якоже церковным правилом и законом подобно, ни единому же супернику противу суду его глаголати могущу.

(л. 787) [3253] Того же Иустиниана царя глава 58.

Аще [3254] же причетник или ин некто вину имать на епископа, первее преподобный митрополит области тоя по священным правилом и по нашим законом таковую вещь да разсудит, и аще кто проречет сужденая, к преблаженному епископу и патриарху вещь возвестити, и той подобный тому вдаст конец. Аще же на митрополита имать что епископ или причетник или ин кто, патриарх того правления подобным образом вещь да судит. По всяких же винах или от своих митрополит или от патриарх или от инех киих любо судей епископи судятся. (л. 787 об.) [3255] И того ради по правилом святых апостол и святых отец на коеждо лето бывати собором.

Правило святых апостол 37.

Дващи [3256] в лете епископи да собираются церковных ради вещей и Божественых повелений, первое убо в четвертую неделю по Пасце, второе же перворетия [3257] октября [3258] во вторый на десять день.

Толкование.

Сие убо правило преславных апостол повелевает дващи в лете собору быти. Но обаче се оставлено бысть, ибо осмое правило Шестаго собора, иже в Трулле полатнем, и шестое, иже в Никеи, Втораго собора единою в лете повелевают в коейждо области от всех епископ собору быти, о (л. 788) [3259] церковных вещех и о Божественых повелений стязаний и о разрешении недоуменных и неразумных вин. И аще который епископ некия или епитемиями тяжкими, сиречь запрещении, или отлучением связал, да и о таковых вещех разсудят вси епископи. Время же едино собору уставиша между Пасхою и между месяцем октябрем, перворетии бо, по еллински и римски октябрь сказается.

Новых заповедей Иустиниана царя глава 8.

Дважды [3260] в лете, июня месяца и сентября, бывати собору, собиратися митрополитом к патриархом (л. 788 об.) [3261] и епископом к митрополитом и истязовати вины, еже епископи и причетници и мниси друг к другу имеют, о вере же и о правилех и о церковных вещех и о инех, и яже чрез правила согрешаемая, исправляти. Властели же и чинове, не нападающии на митрополиты и на епископы, прелагающыя время творити соборы или не возвещающе церкви, конечнее мучими будут.

Веруеши ли сим, яко есть истина? Вем. Яко возглаголеши, верую, и аще веруеши, почто всуе враждуеши на святую Церковь? Аще ли же не веруеши сим, не погрешит той истины, аще (л. 789) [3262] кто изречет, яко несть христианин и клятве повинен по правилом и списанием твоим, якоже и вси еретицы и развратницы Божественых правых повелениих, якоже приточник глаголет: Сердце безумных сопротивится клятвам.

Да ты же пишешь в 14 главе в 1-й статье о крестном целовании.

Которым Московскаго государства всяких чинов руским людем доведетца по судным делам изо всех приказов крест целовати, и им или за них людем их крест целовати в розных исках трожды. А возрастом бы те люди были, (л. 789 об.) [3263] кому крест целовать, в дватцеть лет, а менши дватцети лет не целовать и ко кресту таких не припускать. А у кого таких людей не будет, и им за себя целовать крест целовать самим.

Статья 2.

А будет кто сам или за кого люди его поцелуют крест в розных искех трожды, а после того будет кто учнет на нем чего искать, или он сам на ком учнет чего искать на нем или он сам на ком учнет чего искать, а по тем делам дойдет до веры, и похочет он в ыстцове или в своем иску крест целовати в четвертые, и то дело вершить сыском, а крестнаго целованья в том деле ему не давать. (л. 790) [3264] А будет про то дело сыскать нечем, и то дело розымать пыткою.