Никон - ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы

• Название: ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы
• Автор: Никон
• Жанр: Религия

---

Святых апостол правило 74.

Оклеветаем [3340] епископ и позываем на суд, и не послушая дващи и трищи, двема епископома да позван будет. Аще же не приидет, якоже хощет, собор да осудит таковаго.

Толкование.

Оклеветаема епископа о некоем прегрешении от достоверных мужей и позываема на судище и (л. 806 об.) [3341] не послушающу, не тако вскоре подобает собору осудити таковаго, но и дващи и трищи позвати того, и да посылается по нь на коемждо позвании по два епископа. Аще же пребудет небрегий и не приидет на судище, да испытает вину по единей части собор и по подобию вины достойно да осудят его. Да не мнится избыти [3342] суда беганием.

<... см. лл. 782 об.–805 об. ... — В.Ш.>

Второе же изложение седмыянадесять главы первыя грани двадесять первых книг глаголет: Аще не будет 20-ти лет возрастом, (л. 822) [3343] таковаго на послушество о гресе ни на кого не приимати.

Того же собора правило 132.

Клеветник от своего дому послухов не поставляет.

Толкование.

Своего дому послуси отвержены суть и градскими законы. Глаголет бо ся 21-я глава Книг Царьских яве сице: Клеветник домашних своих послух не может привести. И 25-я главы тоя же грани тех же Царьских Книг глаголет, яко домашняя свидетельство отметаема суть. Домашняя же свидетели разумей, иже под властию некоего и могуще повеленая им от него творити, (л. 822 об.) [3344] таковии убо ни по нем самом, ни на инаго, на него же он клевещет, во свидетельство не приятни, или о греховных, или о инех, яже имениа винах. Аще же ин судим бывая, и восхощет от инаго дому свидетеля привести, не возбранится ему, от единаго бо дому и отец и сын, под властию его сый, и два брата под властию отчею суще, или на кого или по ком не могут свидетельствовати, якоже 21-я глава тоя ж грани, рекше первыя 21-х Царьских Книг повелевает.

Того же собора правило 133.

Глаголяй епископ, яко мне единому причетник грех исповеда, (л. 823) [3345] аще же причетник запрется, неверне есть.

Толкование.

Не подобает веровати, аще возглаголет епископ на некоего причетника, яко он сице причетник мне единому исповеда грех. Того ради греха хощу его или от сана изврещи или общения отлучити. Аще бо вопрошен быв причетник, его же, рече, епископ исповеда ему грех, запрется, глаголя, яко несть ти исповедал, глаголя таковаго греха, не подобает ему осудити его, ни того в досаждение себе вменити, яко той един епископ неверен есть.

Закон судный Великаго царя Константина. Глава 21.

(л. 823 об.) [3346] Свидетелие [3347] от слуха да не свидетельствуют, глаголюще, яко слышахом от коего сего делника или ино что свидетельствующе от слышания, аще и князи суть, иже свидетельствуют.

Новых заповедей Иустиниана царя в 44-й главе. Глава 2.

Яко [3348] един токмо не послушан есть, аще и велик будет сановник, еретик же по всему, не свидетельствует на правовернаго, аще не о людстем строении правоверный судится.

Градскаго закона грани 27 правило 1.

Достовернии [3349] да будут свидетелие, аще не нецыи от ведящих, не от худых же, (л. 824) [3350] ниже отнюдь не знаеми.

О [3351] греховных винах нужда есть всячески привести свидетелие, а не глаголы их.

В [3352] свидетелех взыскают сана и веры и обычая и твердости. Тем же не услышани будут противящиися, иже во свидетельстве реченым от них.

О [3353] коемждо свидетеле должно есть изыскивати, который честен и непорочен есть, или который бесчестен и порочен, или богат, или убог, якоже прибытка ради нечто согрешити, или друг приведшему его, или враг кому, на него же приведен. Егда же зазора кроме (л. 824 об.) [3354] будет, тогда свидетельствует. О сем же и разсуждает судия, аще единаки речи принесут и аще противу вопрошанию послушно отвещавают и которая знамения подобает приимати.

Свидетелем [3355], а не глаголу их веровати, сами бо в лице вопрошаеми бывают от судей о винах. И не показуя предложенаго от него в заточение посылается.

Иже [3356] о гресе некоего оклеветав, не [3357] может свидетельствовати нань, разве аще будет подобная вина. Аще ли ни, возбраняется [3358]. Ходатайствовав между некиими о вещи [3359], не сви(л. 825)детельствует [3360] им в той вине, сиречь пред инем судиею, аще убо не совещаста оба суперника свидетельствовати ему.

Убозии [3361] не свидетельствуют, убог же есть, иже имать пятьдесят златник богатства.

Не [3362] свидетельствует меньший сый возраста двадесяте лет, ни иже на людстем судищи осужденый и не исправлься и в людскую темницу вверженый, ни иже обличен будет взем злато и того ради свидетельствовати хотя или не свидетельствовати.

Не [3363] свидетельствует свобожденый на свободившаго его, ни на сына его.

(л. 825 об.) [3364] Несть [3365] достоверен свидетель, повелевати могий о свидетельстве.

Осужденый [3366] о прелюбодеянии не свидетельствует [3367].

Сын [3368] отцу и отец сынови не свидетельствует ни в коей любо вещи своей.

Раб [3369] не свидетельствует же, на некоего уже свидетельствовав, не свидетельствует паки нань.

Собеседовав [3370] и совокупив о вине, не свидетельствует о ней.

Никто [3371] же истязается свидетельство на себе привести, но подобает к позвавшему на суд, якоже хощет составити свое правословие.

Возбраняет [3372] же ся свидетельствовати несове(л. 826)ршеный [3373] возрастом и раб и глух и нем и бесен и блудник и сын, под властию сый, егда отец его напишется наследник.

И [3374] под властию сый, завещавающа, не свидетельствует о писанем завете наследника.

И [3375] завещавающий под властию сущему отчею о особно стяжаннем имении ему не свидетельствует.

И сия тако в Писаниих обретена о лжесвидетельстве, им же не подобает свидетельствовати.

Ты же пишешь: А будет велможа крест целует или велит кому иному крест поцеловати, и таковых священником (л. 826 об.) [3376] в церковь Божию не пущати и в домы их не приходити и Божественаго пения в дому у них не пети. А будет поп учнет в чьем ни буди доме Божественое пение пети, и такие ротники, которые учинили крестное целование на криве тут же будут, и их ис тое храмины вон высылати.

Божественыя законы епископ и священником исправляти грешников во гресех по святым каноном, а тебе кто дал власть над священниками повелевати и законополагати? И от которых законов взял еси? Мы вемы, яко во святых Писаний не обретаются таковии канони, (л. 827) [3377] но странни некаки еси глаголеши бесовски. Сам закон положил еси крестному целованью на роте, сам же и осквернил целующих. Божествении же закони лжесвидетелей не оставляют без мук, но повинных творят таковых мук, его же оболгали.

Да ты же пишешь в 14 главе в 10-й статье, а в правилех святых отец про крестное целование написано: Будет крестьянин крестьянина напрасно приведет ко крестному целованию или велит крест поцеловати, и он крест поцелует на том, что он прав, и таковаго по нужи кленшагося (л. 827 об.) [3378] Великий Василий на 6 лет запрещению подлагает, сиречь от церкве отлучает по осмьдесят второму правилу своему. Писано есть: Правда от Бога, а лжа от неприязни, то есть от диавола, зане той есть отец лжи. И Божественый апостол глаголет [3379]: И яко всяка лжа от истины несть. Василий Великий, Христов ученик и подражатель Христовых заповедей, и не писывал такова правила, чрез Евангелские заповеди, еже кому крест целовать на правде или на лжи. Богу заповедающу: Не кленитеся ни небом, ни землею, ни иною своею клятвою.

(л. 828) [3380] А ты, лжесписателю, якоже везде лжеши, и зде такожде и на Василия Великаго солга. Василий Великий пишет в своем правиле 82-м не о том, еже кому с суда крест целовать или клятися, но аще кто кленется, еже не сотворити зла котораго, впредь о нем же уведав, яко грех есть. И потом от невнятия запят быв или иною коею виною или принужден и понасилен от кого, якоже самое то правило свидетельствует.

Великаго Василия правило 82.

По [3381] нужди кленся, по шести лет прият будет, а иже без нужди, по дванадесятем.

(л. 828 об.) [3382] Толкование.

Клятся некто сего или инаго не сотворити, якоже се судиа сый не подписати суда нанесенаго на некоего, и потом понужден быв от болшия власти, и подписав, преступи клятву, таковый легчайшим запрещением повинен есть нужди ради, за шесть бо лет запрещение приимет. Аще же кроме некия нужди преступит, о нем же клятся, два лета да влачется и два да послушает Божественых писаний, пять лет да пребудет с припадающими, и два лета прият будет с верными, и молитв с ними приобщится. И тако (л. 829) [3383] по первонадесятем лете Тела и Крове Христовы да сподобится.

Паки глаголешь: А кто крест поцелует на криве, и тому Великий Василий в 64-м правиле полагает запрещение на десять лет, два лета да влачется, три лета да послушает Божественых писаний, четыре лета да припадает и едино лето да стоит с верными и потом Божественаго причащения да причастится.

И якоже исперва на Великаго Василия солгал, и зде такожде. И глаголеши: А кто крест поцелует на криве и тому Великий Василий в 64-м правиле полагает запрещение на 10 лет. Василий Великий не о крестнем престу(л. 829 об.)плении [3384] пишет, якоже и самое то правило являет.