Никон - ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы

• Название: ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы
• Автор: Никон
• Жанр: Религия

---

А еже о неправдех царьских кому любо и всякому обличати греха нет. Писано есть: И глаголах о свидении Твоих пред цари и не стыдяхся. И Господь проповедает, глаголя: (л. 1017) [3924] Предадят [3925] бо ты в сонмища и на соборищах биени будете, и пред воеводы и цари ведени будете имени Моего ради. Егда [3926] же поведут вы предающе, не прежде пецетеся, что рецете или что возглаголете, ни поучайтеся, чтоб отвещевати. Аз бо вам дам уста и премудрость, ей же не возмогут противитися или отвещати вси противляющиися вам. Инде рече: Не [3927] пецетеся, како или что отвещаете или что речете. Святый бо Дух научит вы в той час, яже подобает рещи. И [3928] всяк, иже исповесть Мя пред человеки, и Сын человеческий исповесть его пред ангелы Божиими. А отвергийся Мене пред человеки, (л. 1017 об.) [3929] отвержен будет пред ангелы Божиими. И которая досада царем, аще кто правду ему извествует, а царь, возгордевся, не послушает, но и муки нанесет дерзостию на свидетеля. Не онаго укорит или отмещется царь, но самаго Бога отмещется. Слушаяй бо вас, рече, Мене слушает, и отметаяйся вас, Мене отметается. И не свидетеля слова обесчестит или убиет, но онаго заповедавшаго не стыдетися, обесчестит или уязвит. Тии же по своему труду мзду сторичною приимут от Господа Бога и будут архиереи Богу и Христу, якоже выше есть писано. Ино убо дерзновение, ино дерзость (л. 1018) [3930] или гордость, дерзновение убо, еже аще кто сам волю творит и не творящим засвидетелствует творити. Аще ли кто не послушает единаго, тогда пред двема или трима обличати со дерзновением, якоже и Христос повелевает: Дерзайте, Аз победих мир и не убойтеся бо их. И паки: Не убойтеся от убивающих тело. И прочее. И паки инде речеся: Проповедая Царьствие Божие и уча, яже о Господе нашем Иисусе Христе, со всяким дерзновением невозбранно. Се есть дерзновение.

Дерзость же, еже кому разгордевся, не точию что заповеди Божия послушает, но и на создавшаго Бога (л. 1018 об.) [3931] возгордевся и проповедника слова Божия, дерзость приемше, или досадит или убиет.

Дерзостию [3932] разгордевся, денница спаде с небесе, сокрушися на земли. Рече бо во уме своем: На небо взыду и выше звезд небесных поставлю престол свой. Взыду выше облак и буду равен Вышнему. Ныне же снидеши во ад. О нем же и Христос свидетелствова: Видех, рече, сатану, яко молнию с небесе спадоша [3933]. Дерзновение же восприим архангел Михаил, иже ко Владыце благоразумие, яко слуга верный, видев отступника падшася. Собрав архангельския лики, рече, вонмем и станем добре (л. 1019) [3934] пред Сотворшим ны и не помыслим сопротивных на Сотворшаго ны. Видяще сатану, что подъя, и сущии с ним, доселе убо свет суще, ныне же быша тма. И сверже с небесе Михаил архангел с прочими небесными силами сатану и все бесовское множество. Якоже и Иоанн Богословец виде: И [3935] бысть брань на небеси. Михаил и ангели его брань сотвориша на змия. И змий брася и ангели его, и не возмогоша, ниже место их обретеся к тому на небеси.

Толкование.

Сие мощно примерити и к первому диаволю испадению от ангельскаго чина за дерзость и гордыню, архистратигу Михаилу не терпящим (л. 1019 об.) [3936] в лепоту того своего сии с пребывания извергоша первее. Якоже глаголет Иезекииль: Яко от херувимов извержен бысть той из среды огненных камений, из небесных, мню, чинов, занеже обретошася в нем беззакония и неправды. В пришествии же Христове служащии Ему после искушения, аки обесчещена раба паки возгнушася. Вестно же и се буди, якоже отцем возмнеся по содетелстве чювственаго мира. Сице гордостию и завистию низвержен бысть и в лепоту, не стерпе бо неба земнаго мудрования, якоже и во псалме пишет: Вражие оружие оскудеша вконец.

(л. 1020) [3937] Видел ли еси, како дерзость и гордыня от ангел в бесы претвори и от света во тму, от Божественыя славы в нищету вечную, от неизреченныя радости в муку бесконечную.

Тако и человецы, аще и царие и князи, дерзающе не в сущих своих, но гордящеся ныне множества людей, не избавятся богатством и гордостию, отправятся от праведнаго суда Божия, по писаному во псалмех: Егда умирая, не оставит ли вся, ниже снидет с ним слава его, яко душа его в животе его благословится, егда благо сотвориши.

Послушай к сим и о человечестей гордости (л. 1020 об.) [3938] и о дерзости. Адам [3939] и Ева не дерзости ли ради из рая изгнася? Аще не бы помыслили бози быти, не бы вкусили от заповеданаго им древа и вместо первыя богоданны одежди нази быша. Се есть дерзость.

Дерзостию [3940] или презорством Каин Богу дары принесе от вторых, а не от первых и обесчестися от Бога. Он же не точию о сем покаяся, приложи от дерзости и другое зло, и брата уби. Таже и третие, и Богу солга, рече, еда аз страж есмь брату своему. И что бысть ему, не не веси ты, какова мука прежде вечныя муки. Умучи того Бог, стеня и трясыйся вся (л. 1021) [3941] дни живота своего.

Такожде и о дерзновении не оставим тебе известити. Дерзновением принесе Авель жертву Богу от первородных овец его и от туков их, и призре Господь на Авеля и на дары его. Зри дерзость и дерзновение. И рече Каин ко Авелю, брату своему: Пойдеве убо на поле. Се есть дерзость. И иде Авель, яко овча незлобивое, последуя убийце брату своему. Се есть дерзновение. И бысть внегда быти им на поле и уби его. Дерзостию [3942] Ламех уби Каина и отмстися седмьдесят седмерицею. От [3943] таковыя дерзости осквернися земля пред Богом и наполнися не(л. 1021 об.)правды [3944]. И виде Бог землю, иже бе осквернена, яко оскверни всяка плоть путь свой на земли. И рече Господь Ною: Время всякаго человека прииде пред Мя, яко наполнися земля неправдою от них. И се Аз разсыпаю землю [3945]. И наведе Господь потоп на землю, и умре всяка плоть движущаяся по земли.

Дерзновением [3946] Ной сотвори ковчег, якоже заповеда ему Господь Бог во спасение себе и дому своему. Дерзостию [3947] сотвориша безумни человецы столп на земли, их же разсея Господь по лицу всея земли. Дерзновением [3948] Евер не приступи совету Немирову созидати столп, от него благословении людие изыдоша (л. 1022) [3949] и нарекошася евреи. Дерзновением [3950] Авраам послушал Господа, изыде от роду своего и от дому отца своего и бысть ему внити во Египет глада ради. Дерзостно [3951] видевше египтяне жену его, яко добра бяше зело. Видеша ю князи фараони и похвалиша ю фараону, и введоша ю в дом фараонов, и хотяше ю фараон онасиловати, и не попусти ему Бог, и мучи его великою мукою, дондеже ударив, отпусти ю. Дерзостию [3952] Авимелех, царь Герарский, взят у Авраама Сарру красоты ради ея, и не попусти ему Бог осквернити ю. Явися Авимелеху (л. 1022 об.) [3953] Бог во сне, заповедая не прикоснутися ей. Аще ли прикоснется, смертию умреши ты и все твое. Воста же рано, Авимелех призва отроки своя и глагола им словеса сии во уши их. Убояша же ся вси человецы зело. И возва Авимелех Авраама и рече ему: Что еси сотворил нам, еда что согрешихом тебе, да возложи на мя грех и на царьство мое велик зело. И дело, его же никто же сотвори, ты сотвори, что умыслил еси сотворити се. Рече же Авраам, рекох: Еда несть боязни Божия в месте сем, да мя убиют жена моея ради. И отпусти ю корыстию многою (л. 1023) [3954] ко Аврааму, мужу ея.

Дерзновением [3955] Авраам от Бога обетование прият, отец многим языком наречеся. Дерзновением [3956] Авраам с 318 домочадцы победи 5 царей 300 000. Дерзновением [3957] верова Авраам Богу и вменися ему в правду и друг Божий наречеся. Дерзновением [3958] Авраам Богу в дому своем прият, аки любимаго гостя учреди. Дерзновением [3959] приступив Авраам Господу, рече: Погубиши ли праведнаго с нечестивыми и будет праведный яко нечестивый. Аще есть и праведных во граде, погубиши я, не оставиши ли всякому граду и (л. 1023 об.) [3960] праведных ради, аще суть в нем. Никако же сотвориши по словеси сему, еже убити праведнаго с нечестивыми и будут праведнии яко нечестивии. Никако же ты судия земли не сотворити суд. И рече Господь: Аще обрящется в Содомех 50 праведных, оставлю весь предел тех ради. И отвеща Авраам: Ныне начах глаголати ко Господу моему, аз есмь земля и пепел. Да аще будет от 50 праведных 45 погубиши ли 45 ради праведных весь град? И рече: Не погублю, аще обрящу ту 45. И приложи еще глаголати к нему и рече: Аще обрящутся ту 40. И рече: Не погублю, аще обрящутся 40. (л. 1024) [3961] И рече: Елма же Господи имам глаголати, аще обрящутся их 30. И рече: Не погублю 30 ради. И рече: Да что есть глаголю, Господи, аще обрящется их 20. И рече: Не погублю 20 ради. И рече: Еда, Господи, что аще глаголю единою еще, аще обрящутся их ту 10. И рече: Не погублю 10 ради. Отъиде же Господь, яко сконча глаголя ко Аврааму. Се есть дерзновение.

Дерзновением [3962] вознесе Авраам Исаака, сына своего, на жертву Господеви Богу. Дерзновением [3963] Лот, сидя при вратех града, срете два ангела и поклонися лицем до земли и учреди я в своем дому.

Дерзостию мужие града Содомска обыдоша дом его, от юнот (л. 1024 об.) [3964] даже и до старец, весь народ вкупе. И иззываху Лота и глаголаху к нему: Где еста мужа, яже приидоста к тебе нощию? Изведи я к нам, да будем с ними.

Дерзновением ангели ослепиша я, и Лота и жену и две дщери, емше за руки их, изведоша в Сигор и Содом погубиша.