Никон - ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы

• Название: ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы
• Автор: Никон
• Жанр: Религия

---

Того же святого собора правило 3.

Никоторый [3853] же епископ не позван во град да не приидет. И епископ с епископом аще имать прю, чюжаго епископа да не призовет. Аще ли же ни, да судит Римский, ту будут чюждии.

Толкование.

В различных правилех речено есть, еже никому же дерзнути (л. 954) [3854] от своего предела во иную область преходити, аще не будет позван от области тоя митрополита и от сущих с ним епископ. Тожде убо и сей святый собор повелевает, но аще который епископ с другим епископом о некоей вещи распрю имать и с ним да судится пред собором тоя области, в ней же есть. И не подобает от иныя области разума ради неких епископ призывати, но от единех тоя области епископ судитися. И аще не угоден ему будет суд и мнит, яко не по праву осужден быв, судивый его митрополит и епископи, да возвестят Римскому Папе (л. 954 об.) [3855] писанием вину и суд, како осудиша и. И аще не восхощет того суда и той, или сам разсмотрив суд, аще право осужден бысть, возвестит им писанием. Аще ли же ни, тамо близ их сущия области епископом повелит, да сотворше собор, судят ему паки второе.

Того же святаго собора правило 12.

Позван [3856] епископ от епископа, позвавшему же его невежде сущу, да не глаголет почасту на людех, порок бо есть невеждному и обругание епископии его, и обое не без порока.

Правило 13.

Без нужди тяжки бедно есть епископу свою (л. 955) [3857] церковь надолзе оставляти.

Толкование обема правилома.

Аще который еспикоп в другий град прейдет, позван бысть епископом страны тоя, и аще же будет позвавый его епископ невежда, не ведый добре Божественых писаний и учительству неискусен, позваный епископ да не учит прилежно люди и да не глаголет в народе много Божественых писаний. Таковое бо дело мятеж составляет и преобидение творит позвавшему его епископу. Мнит же ся указанием таковаго учения, чюжду себе обручая церковь и люди к себе привлачая и тщася преданую ему церковь оста(л. 955 об.)вити [3858] и в ту преити. Сего ради убо повеле сей святый собор да позваный епископ вящше трий недель от своея церкве да не останет, но к порученым ему людем да возвратится, аще не некая нужда тяжка и вещь неудобна сотворит его вящше того пребыти от своея церкве.

Святаго Вселенскаго 6-го собора правило 20.

Епископ [3859] во инем граде в народе да не учит. Аще же обрящется, да престанет от епископства и презвитерская действует.

Толкование.

Епископ во инем граде в народе уча, понеже гордости и буести ради преобидит ту сущаго (л. 956) [3860] епископа, яко тщася посрамити и уничижити и чюждий престол себе обручити по достоянию да престанет таковый от епископства, иже бо чюждих желает, своих лишен будет и на презвитерское место свести того и презвитерская да действует. И назнаменай се когда епископ на презвитерское место сводится, ибо 29 правило Халкидонскаго собора святотатство отнюдь нарицает, еже епископа на презвитерский свести степень. И имей сие правило преболше Вселенскаго онаго правила.

И написав сия святыя правила, отослал Никон Патриарх к бояром и властям. А Газский (л. 956 об.) [3861] митрополит, как услышил таковыя святыя правила, почал как бешеный кричать нелепым гласом по латине. И Никон Патриарх говорил: Всяко древо зло и плод его зол. Рече Господь: Рабе лукавый, от уст твоих сужду тя; яко неси православен понеже и языком латинским блядословиши нас.

И к тому Патриарх не приложил говорить к нему, а Астраханской ничево иново не говорил, разве сего: Был ты нам отец, а стал пуще вотчима. А архимарит Богоявленской говорил: Я де тебя старее сам в попех и ины бранныя нелепые слова. (л. 957) [3862] Да боярин же князь Никита говорил Никону Патриарху: Что де ты отчитаешь государя от христианства. И Никон Патриарх: Буде хошь о том ведать, и аз дам, написав. И боярин говорил против того: Как де у тебя и язык тот воротится говорить, не стерпит де тебе Бог. Добро бы де ты в келье посидел, так бы де ты смирнее был. И Патриарх Никон говорил: Не точию от злодейства вашего в келье готов правды ради сидеть, но и умрети готов есмь. Да боярин же говорил: Ты де уж и сам бывшей Патриарх. Почему бывшей? Да ведь де ты (л. 957 об.) [3863] оставил уж патриаршество. И Патриарх говорил: Патриаршества не оставливал и святительства, злобы ради вашея отшел, дая место гневу, по писаному, исполняя заповедь Христову: Егда гонят вы во граде сем, бегайте во другий. Аминь, глаголю вам, не имате скончати грады Израилевы, дондеже приидет Сын человеческий.

Несть [3864] ученик над учителем своим, ниже раб над господином своим. Довлеет ученику, да будет яко учитель его и раб яко господь его. Аще господина дому Веелзевула нарекоша, колми паче домашняя его, не убойтеся убо их. (л. 958) [3865] И паки инде рече Господь: Оставите их, вожди суть слепии слепцем. Слепец же слепца аще водит, оба в яму впадетася [3866]. И паки [3867]: И иже аще не приимет вас, ниже послушает словес, исходяще из дому или из града того, отрясете прах ног ваших. Аминь, глаголю вам, отраднее будет земли Содомстей и Гоморстей в день Судный, неже граду тому. И паки инде рече: А не веруяй, уже осужден есть. Во [3868] грядущую ж субботу мало не весь град собрася послушати слово Божие. Видевше июдее народ, исполнишася зависти и вопреки глаголаху глаголемым от Павла, сопротив глаголюще и хуляще. Они же, отрясше (л. 958 об.) [3869] прах от ног своих на них, приидоша во Иконию. И аще нас вины ради благословныя отшествие сотворим, бывшим Патриархом порицаете, то уже и Законоположника нашего Господа Бога и Спаса нашего Иисуса Христа укоряете нас ради. Множицею отходя зависти жидовския, от пелен убо бегун является Иродова злобесия [3870]. Отшедшим же волхвом се ангел Господень во сне явися Иосифу, глаголя: Востав, поими Отроча и матерь Его и бежи во Египет, и буди тамо, дондеже реку ти. О ком се писано?

И паки слышав Иисус [3871], яко Иоанн предан бысть, отъиде в Галилею, (л. 959) [3872] оставль Назарет. Кто се есть?

И исполнишася вси ярости в сонмищи и слышавше сия, восташа, изгнаша Его вон из града и ведоша Его до верху горы, на ней же град их создан бяше, да быша, Его низринули. Он же, прошед посреде их, идяше. О ком се речеся?

И [3873] хождаше Иисус по сих в Галилеи, не хотяше бо во Июдеи ходити, яко искаху Его июдеи убити, взяша камение да вергут нань. Иисус же скрыся, изыде из церкве, прошед посреде их и мимо хождаше тако. И искаху убо паки яти Его, изыде от рук их и иде паки на он пол Иордана на место, идеже бе (л. 959 об.) [3874] Иоанн крестя. И пребысть ту. И паки рече учеником Своим: Востанете, идем отсюду.

Кто паче Петра от самаго Бога свидетельствован, камень веры, на нем же созда Господь Церковь свою; Ей, рече, врата адова не удолеют. Ключарь Царьства Небеснаго, и его же свяжеши, рече, на земли, будет связан на небеси, и его же разрешиши на земли, будет разрешен на небеси. И [3875] сей разрешен ангелом, от юз ис темницы избеже.

Кто же ли паче Павла, самим Богом свидетельствован, сосуд избраный, иже до третияго небеси восхищен и слышав глаголы неизре(л. 960)ченыя [3876], их же не леть есть человеку глаголати. И сей, свешен в кошнице от ученик, из Дамаска избеже. И яко же бысть стремление языком со июдеи к началники их досадити и камением побити их. Уведевше же, прибегоста во грады Ликаонския.

Еда и сии бегства ради от злобы бывшие вам, а не и ныне, Христос Бог вам есть Бог, такоже и апостоли, бывшия вам, апостоли.

Почто ныне бывшим, а не от исперва вшед к нам? И почто благословение наше от исперва добро и благоприятно бысть и быв сам у нашего благословения, ныне порицаешь? Якоже благословение наше (л. 960 об.) [3877] от исперва было праведно и добро, да неблагословение наше пребудет на вас твердо. Видели есте и сами, как мы в татарской сполох на Москве и у царьскаго величества были, ни в чем перед прежним неизменно, ведая наше неповинное отхождение. Такожде и царь и царица и царевич и царевны у благословения были, и вы, бояря, вси, нихто ни в чем не пороча.

И святаго Сардикийскаго собора правило 19.

Без [3878] правды епископ изгнан, аще и в чюждем пределе пребывает, приятен бывает, дондеже досаждение мимоидет.

Толкование.

От буести и гордости возбраняюще (л. 961) [3879] святии отцы, повелеша епископом в реченое время во инех епископиях пребывати. Аще же некий епископ исповедания ради чистыя нашея веры или понеже бе поборник истине, рекше противяся властелем, не творящим истины, и того ради от своего града изгнан быв и в другий град приидет, не возбранится ту пребывати ему, дондеже примирение обрести возможет и пременение бывшаго на нем досаждения.

Боярин же говорил Патриарху: Даешь де руку свою целовать всяким людем по церкви, и то де худо ты делаешь. И Патриарх говорил: Хто тебе про то велел (л. 961 об.) [3880] говорить, государь ли царь или ты сам о себе? И боярин сказал: Мне де велел государь говорить. И Патриарх: Да почто царь сам поповы руки целует, которые нами посвящены и ко благословению приходя, и сам главу свою преклоняет? Мы тому чюдимся. Про что царь архиереом, иереом нудит руки своя целовать? Не суть архиерей, ни иерей, аще и ему, государю, за премногую его гордость мнится священство менши царьства. Познает тогда различие царьства и свяшенства, егда познани будем от нелицемернаго судии Христа и Бога нашего.