Никон - ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы

• Название: ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы
• Автор: Никон
• Жанр: Религия

---

РАЗОРЕНИЕ 19 ВОПРОСА И ОТВЕТА

Глаголеши, совопросниче, яко Никон никого не оставил на своем месте, кто б на его месте чинствовал.

Каким же обычаем митрополит Крутицкий чинствует безопасно на месте патриаршеском?

Ты же, ответотворче, глаголеши: Который ни есть истинный прямый архиерей, когда хощет итти на которыя места (л. 170 об.) [644] для какова случая нужново, оставляет на своем наместника своего, так чтем в книгах Моисеовых. Когда Моисей хотел итти для приятия законнаго, оставил Аарона и Ора, что судили, покамест он не поворотился. А для того началной человек имеет такое долженство, чтоб всегда был особою своею, где его подданныя, которыя ему послушныя, да молятся и иныя об нем да поют же все молебны церковныя. А се и аз сам не стану молитися и своего правила не буду правити, не будет удоволно, что я совершил свое правило и моление. А подобает, да пощусь, когда хочю, чтоб мое моление и должность (л. 171) [645] удоволствована была. Я печати Господа Иисуса Христа на теле моем ношу, говорил святый Павел апостол: трожды благословен. Достойно бы когда патриарх, есть ли бы имел на уме своем не на болшое время от престола своего итти, постановил бы на своем месте, который бы чинствовал по его веленью доброю волею, кому бы он то вручил. Но понеже избег, и онаго пения поспешил маленко, забыв воспомянути, не хотел, не бояся оных наказов, проклят, кто таинства Божия оправляет неохотно. Для того, когда Никон не оставил на своем месте наместника своего, надобно б было, чтоб был наместник, которой бы чин(л. 171 об.)ствовал [646] на месте его и всякия правила церковныя творил, чтобы Церковь Божия пуста и без пения не была и в хитрости не были службы Божии, приказано от благочестиваго государя нашего, что он по сей день чинствует церковныя правила. Добро, как остался Аарон и Ор наместники Моисеовы, покамест не возвратился от горы Синайския со крыжали завета, чтоб не был люд израилтейский без главы пустой. Велико нечто было воистину, то не оставил на многия дни Моисей люд июдейский без началника и оберегателя. А Никон, который отступился чрез столко месяцей и лет, не радел, чтоб написал ко благочестивому царю, чтоб поберег его престол. (л. 172) [647] Однако же зделал как странный и чюжий епископ без всякаго порядку и прилежности, а добро ведаем, кто добрый пастырь, душю свою положит за овцы своя.

До сих твоих глагол, лицемере, без лености выслушал и зело показался ми еси некнижен, сам весь еси во гресе и ответы твориши чрез Божественая Писания, доброе уничижаеши, а злое обновляеши.

Писано есть, грешнику рече Бог: Вскую ты поведуеши и восприемлеши завет Мой усты твоими. Ты же возненавиде наказание мое и отверже словеса моя вспять. И глаголеши, аз пошед, не оставил никово наместника по себе, как Моисей, пошедши (л. 172 об.) [648] для приятия закона оставил Аарона и Ора.

Ни Моисей, побежав от Египта, оставил кого, но всех с собою взял в пустыню и в пустыне чинствовал и по себе Аарону и Ору приказал, восходя на гору Санайскую, разсуждати повеле, аще кому прилучится пря. Нам же от злобы царьския отходящим, аще бы и приказать, не послушал бы никто, разве его царьскаго повеления, якоже и ныне действуется. А идеже ныне Христа ради скитаемся, не без того чина обретаемся. А что глаголеши, что началной человек имеет такое долженство, чтоб всегда был особою своею, где его подданныя, которыя ему послушныя, да молятся и иныя о нем (л. 173) [649] да поют же все молебны церковныя. А се аз и сам не стану молитися и своего правила не буду правити. И не будет удоволно, что я совершил свое правило и моление. А подобает, да пощуся когда хощю, и чтобы мое моление и должность удоволствована была.

Правду истинную изрекл еси сам о себе. Тем же и аз не без правды ответ творю ти. Божие есть слово ко пророку и не может ложно бы(л. 173 об.)ти [650], яко в нем же застану, в том и сужду тя.

Ты глаголеши, чтобы за тебя поведанныя молилися и долг твой отправляли. А ты когда и не хощеши поститися и молением молитися и своего правила правити. А подобает, да пощуся, когда хощу (л. 174) [651] и чтоб моление твое и должность удоволствована была от подданных твоих. Да кто весть от подданных твоих, где есть ти и что твориши и еже бы им за тебя молити? Обаче едино истинно о себе свидетелствуеши, что ты ни постишися, ни молишися, якоже мы слышахом от достоверных свидетелей, иже при тебе пребывающии исповедаша, что ничим же лутче есть поганина. Внегда ходити к Троицы Живоначалной в Сергиев монастырь, ни постившася тебя видели когда, ни молившася, но всегда днем и нощию ядуща и пиюща, яко свиния, и ничто же ино благотворяща. Послушай убо писания [652], яко не подо(л. 174 об.)бает [653] на иных исправление надеющемуся, яже о себе не радети.

Сотвористе [654] убо плоды достойны покаянию и не начинайте глаголати в себе отца имамы Авраама. Глаголю бо вам, яко может Бог от камения сего воздвигнути чада Аврааму, уже бо и секира при корени древа лежит. Всяко убо древо, не творящее плода добра, посекается и во огнь вметается.

Яко [655] ничто же ползуют себе сожительствующии угодным Богови и свое мудрование не исправляюще, аще и по видимому к ним приносят подобие.

Тогда [656] уподобися Царство Небесное десятим девам, яже прияша светилники своя и изыдоша во сретение Жениху, пять (л. 175) [657] бе от них мудры и пять буия. Буия же приемше светилники своя, не взяша с собою елеа. Мудрыя же взяша елеа в сосудех своих. И приводит по мале о буих.

Господи, Господи, отверзи нам. Он же отвещав, рече: Аминь, глаголю вам, не веде вас. Глаголю [658] же вам, в ту нощь два будета на ложи своем, един поемлется, а другий оставляется. Две мелющи вкупе, едина поемлется и другая оставляется. И отвещавше, реша Ему: Господи, Господи. Он же рече им: Идеже труп, тамо соберутся орли. Не вси, иже от Авраама, сии суть сынове Авраамли, но иже дела Авраамская сотворит, сей сын (л. 175 об.) [659] Авраамль есть. Ни иже от Израиля, сии суть израилтяне, но иже дела израилтейска сотворит, он есть израилтянин.

Писано есть: Вера без дел мертва есть, тако и ты без дел своих, на иных надеяся делы, мертв еси от жизни праведных, почто живых соблажняеши.

Ты же глаголеши, приказано Крутицкому митрополиту от благочестиваго государя нашего, что он по сей день чинствует церковныя правила. Добро, как остался Аарон и Ор наместники Моисеовы, покаместа возвратился Моисей от горы Синайския со крыжали завета, чтоб не был люд израилтейский без главы, пустой. Велико нечто было воистину, то не оставил (л. 176) [660] не на многия дни без началника и оберегателя. А Никон, которой отступился чрез толко месяцей и лет, не радел, чтоб написал ко благочестивому царю, чтоб поберег его престол. Однако же зделал как странный и чюжий епископ без всякаго порядку и прилежности. А добро ведаем, кто добрый пастырь душю свою положит за овцы своя.

Как в преждних своих ответех, злоумне, неправедно писал, тако и зде солгал, еже добро, глаголеши, что приказал государь Крутицкому митрополиту. Писано [661] есть: Верный в мале и во мнозе верен. Не верный в мале и во мнозе не верен есть. Покажи известно (л. 176 об.) [662] не от своих гнилых произношеней, но от Божественаго Писания, где есть такия законы, да царие в церковных преданиох и уставох исправляют и повелевают, якоже ты глаголеши. Аз же ти покажу.

Господу глаголющу: Никто [663] же может двема господинома работати. Любо единаго возлюбит, а другаго возненавидит, или единому прилежит, а другаго не радит. Не можете Богу работати и мамоне.

Аз от Бога изыдох и приидох, не бо от себе приидох, но Он мя посла.

Мне [664] подобает делати дела пославшаго мя. И в Нем же аще кто призван, в том да пребывает. (л. 177) [665] Что бо имаши, еже не приял еси? Како же проповедят, аще не послани будут? Егда [666] раби бесте греху, свободни бесте от правды. Да никто же вас лстит тщимы словесы. Сих [667] бо ради грядет гнев Божий на сыны противныя. Доволно ли ти есть ко указанию, яко не подобает не сущими своими владети или повелевати, аще мнит царь, яко добро творит, владея и повелевая во священных уставох, не чюдися, что Бог терпит на болшее и лютейшее отмщение.

Писано есть: Приидоша [668] же нецыи в то время, возвещающе Ему о галилеох, их же кровь Пилат смеси с жертвами их. (л. 177 об.) [669] И отвещав Иисус, рече им: Мните ли, яко галилеане сии грешнейши паче всех, галилеани бяху яко сице пострадаша. Ни, глаголю вам, но аще не покаетеся, вси такожде погибнете. Или о богатстве благости Его в пождании в долготерпении не радиши, не ведый, яко благость Божия на покаяние тя ведет. По жесточеству же твоему и по непокаянному сердцу, щадиши себе гнев в день гнева и откровения праведнаго суда Божия, иже воздаст коемуждо по делом его.

Яко [670] не искусиша Бога имети в разуме, сего ради предаст их Бог, а неискусен ум творити неподобная.

Елма [671] любовь не прияша (л. 178) [672] истинную, спастися им. Сего ради посла им Бог действо прелести, воеже веровати им во лжу.

И ты, ответотворче, приводиши от древняго писания, добро как остался Аарон и Ор. Что же чюдесно показали, остався Аарон и Ор, якоже пишется во Исходе книг: Видевше [673] же людие, яко умедли Моисей снити с горы, восташа людие на Аарона и глаголаша ему: Востани и сотвори нам боги, иже пойдут пред нами. Моисей, бо сей человек, иже изведе нас из Египта, не вемы, что ему бысть. Рече же им Аарон: Измите усерязи златыя из ушию жен ваших и дщерей и принесите ко мне. И со(л. 178 об.)твориша [674] тако. И взя от руку их, и слияв образ, и сотвори им телец лиян. И рекоша: Сии бози твои, Израилю, иже тя изведоша из земли Египецкия. Видеша же, Аарон созда олтарь прямо ему и проповеда Аарон велик день Господень утре, и обутрив наутрия, и вознесе сожжения, и принесе требу спасения, и седоша людие ясти и пити, и восташа играти. И рече Господь к Моисею, глаголя: Сниди скоро отсюду, беззаконниша бо людие твои, их же извел еси из земли Египецкия. Преступиша с пути скоро, иже заповедал еси им, и сотвориша себе телец и поклонишася ему, и жертвоваша, глаголюще: Сии бози твои, Израилю, иже из(л. 179)ведоша [675] тя из земли Египецкия. Ныне же не дей Мене, да возъярився гневом на ня, потреблю. И прочее.