Никон - ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы

• Название: ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы
• Автор: Никон
• Жанр: Религия

---

Тако и в законе от Бога свидетельствовася, первая и великая заповедь любити Бога от всего сердца, вторая же любити ближняго своего яко себе.

Иисус [617] же рече ему: возлюбиши Господа Бога твоего от всего сердца твоего и от всея дущи твоея. Си есть первая и болшая заповедь. Вторая же подобна ей, возлюбиши ближняго своего яко сам себе.

Яко [618] обличение, еже не любити Бога и Христа Его, еже заповеди Его не творити. Показание же, еже любити творение заповедей Христовых и тер(л. 166)пение [619], во иже о Нем страданиох даже до смерти.

Имеяй [620] заповеди Моя и творяй их, он есть любяй Мя. Не любяй Мя, словес Моих не соблюдает.

Аще [621] заповеди Моя соблюдете, пребудете в любви Моей, якоже Аз заповеди Отца Моего соблюдох и пребываю в Того любви.

Яко [622] достоит всяку ненависть очищающу ко всем и враги любити, о другох же и душю положити, егда потреба призовет такову имуще любовь, якову же име Бог к нам и Христос Его.

Слышасте [623], яко речено бысть древним: Возлюбиши искреняго своего и возненавидиши врага своего. (л. 166 об.) [624] Аз же глаголю вам, любите враги ваша, добро творите ненавидящим вас и молитеся за творящих вам обиду и ненавидящих вас. И по мале. Будите убо вы совершени, якоже Отец ваш небесный совершен есть.

Тако бо возлюби Бог мира, яко и Сына Своего единороднаго дал есть.

Си [625] есть заповедь Моя: да любите друг друга, якоже Аз возлюбих вы. Болши же сея любви никто же имать, да кто душю свою положит [626] о друзе своем, и будете сынове Вышняго, яко Той благ есть на безблагодатныя и лукавыя. Будите убо щедри, якоже и Отец ваш небесный щедр есть.

Видите [627], какову любовь дал Отец нам, да чада (л. 167) [628] Божия наречемся и есмы. Возлюблении ныне чада Божия есмы не уявись, что будем, вемы же, яко аще явится, подобни Ему будем и узрим Его, якоже есть.

Составляет[1209] же свою любовь в нас Бог, яко и еще грешником сущим нам, Христос о нас умре. Бывайте [629] же подобни Богу яко чада Божия, и ходите в любви, якоже и Христос возлюби нас и Себе предаст за ны, приношение и жертву Богови.

Яко [630] показание Христовых ученик, яже о Нем ко друг другу любы.

О [631] сем познают вси, яко Мои ученицы есте, аще любовь имате друг ко другу.

Глаголяй [632] во свете быти, а брата своего ненавидит, во тме есть доселе. Любяй брата (л. 167 об.) [633] своего, во свете пребывает и соблазна в нем несть. Всяк не творяй правды, несть от Бога, и не любяй брата своего, яко се есть обетование, еже слышасте, исперва да любим друг друга, не якоже Каин от неприязни бе и закла брата своего и за кую вину закла его, яко дела его лукава быша, а брата его праведна. И по мале. Не любяй брата своего пребывает в смерть. Всяк, ненавидяй брата своего, человекоубийца есть. И весте, яко всяк человекоубийца не имать живота вечнаго в себе пребывающаго. О сем познахом любовь, яко Он по нас душю свою положи, и мы должни есмы по братии душу свою полагати.

Возлюблении [634], возлюбим (л. 168) [635] друг друга, яко любы от Бога есть. И всяк любяй от Бога рожден есть и разумеет Бога, а не любяй, не позна Бога, яко Бог любы есть.

Возлюбленнии, аще сице возлюбил есть нас Бог, и мы должни есмы друг друга любити. Бога никто же нигде же виде, аще любим друг [636] друга, Бог в нас пребывает и любы Его совершена есть в нас. Бог любы есть, и пребываяй в любви, в Бозе пребывает, и Бог в нем пребывает.

Аще [637] кто речет, яко люблю Бога, а брата своего ненавидит, ложь есть, ибо не любяй брата своего, его же виде, Бога, Его же не виде, како может любити. И сию заповедь имамы от Него, да любяй Бога, любит (л. 168 об.) [638] и брата своего, не любим словом и языком, но делом и истиною.

Видел ли еси, человекоугодниче, в Божественом Писании, самем реченное Господем нашим Иисусом Христом, чесого ради подобни Богу бываем и чада Божия нарицаемся. Аще ходим в любви Его, якоже и Христос возлюбил есть нас. И чесого ради во тме ходим, понеже брата ненавидим, и чесого ради несмы от Бога, понеже не творим правды Его, и чесого ради, яко человекоубийцы вменяемся и пребываем в смерти, понеже ненавидим братию, и чесого ради антихристи нарицаются, понеже не творят истины, и како той наречется подобен Богу. Бог заповеда: (л. 169) [639] Слушаяй вас, Мене слушает, и отметаяйся вас, Мене отметается.

И божественный апостол Павел наказует: Братие, повинуйтеся наставником вашим и покаряйтеся. И прочая.

Ныне же вместо послушания преслушание и отметание и досаду творят. И вместо повиновения и покорения неповиновение и укорение и изгнание, и вместо правды неправду, вместо братолюбия ненавидение.

Разсуди себе, что твориши, и им же твориши, ты ниже мене знаешь, ниже видел или слышал еси от мене что, и судиши и ответы твориши, от единаго неправеднаго человека прием клевету, чрез Божественыя законы ответы твориши. Первое, (л. 169 об.) [640] по правилом святым сам еси чюжд явился всякия Божественыя благодати, еже в чюжей епархии много время жити, свою оставя. Второе, за неподобное деяние, еже чрез 4-го собора 9-е правило един ты митрополит осуждаеши патриарха. Божественнии же отцы возбраняют и митрополитом митрополита судити, развее епископа, но и епископ, аще не восхощет суда митрополичья, и того судит патриарх. А ты, гордостию превзявся, якоже и сатана, хотя быти подобен Вышнему, но бысть антихрист, еже есть сопротивник Христов, якоже Иоанн Богослов пишет: Дети [641] последняя го(л. 170)дина есть. И якоже слышасте, яко антихрист грядет, и ныне антихристи мнози быша, и от сего разумеваем, яко последний час есть. От нас изыдоша, но не быша от нас, аще бо быша от нас, пребыли убо быша с нами, но да явятся, яко не беша вси от нас.

ВОПРОС, ГЛАВА 19

Никон никого не оставил на своем месте, кто б на его месте чинствовал; каким же обычаем митрополит Крутицкой чинствует безопасно на месте патриаршеском?

Ответ

Который ни есть истинный и прямый архиерей, когда почет итить на которые места для какова случая нужднаго, оставляет на своем месте наместника своего. Так чтем в книгах Моисеовых: когда Моисей хотел итить для принятия закона, оставил Аарона и Ора, чтоб судили люди, покамест он бы не поворотился; для того что началной человек имеет такое долженство, чтоб всегда был особою своею где его подданныя, которыя ему послушныя, да молятся и иныя об нем, да поют же все молебства церковная; а се и аз сам не стану молитися и своего правила не буду правити, не будет удоволство что я совершил свое правило и моление; аз подобает да пощуся когда хочю, чтоб мое моление и должность удоволствована была. Я печати Господа Иисуса Христа на себе ношу, говорил святый Павел апостол трижды благословен. Достойно бы когда патриарх, есть ли бы имел на уме своем не на болшое время от престолу своего итить, постановил бы на своем месте который бы чинствовал по его повелению, доброю волею, кому бы он то вручил. Но понеже избег и онаго пения поспешив, маленко допети забыв и воспомянути не хотел, не бояся оных наказов: проклят кто таинства Божия отправляет неохотно. Для того, когда Никон не оставил на своем месте наместника своего, надобно б было, чтоб был наместник, который б чинствовал на его месте и всякия правила церковныя творил, чтоб Церковь Божия пуста и без пения не была, и в тихости б не были службы Божии, приказано Крутицкому от благочестиваго Государя нашего, что он по сей день чинствует церковныя правила добро. Как остался Аарон и Ор наместники Моисеовы, покамест не возвратился от горы Синайския с скрыжали завета, чтоб не были люди израилския без главы пустой. Велико нечто было воистину, что не оставил на немногие дни Моисей людии июдейския без началники и оберегатели. А Никон, который отступился, чрез столко месяцей и лет не радел чтоб написал ко благочестивому Царю, чтоб поберег его престол. Однако ж зделал как странный и чюждый епископ, без всякаго порядку и прилежности. А добро ведаем, что добрый пастырь душу свою полагает за овцы своя. Ближен был Моисей к смерти и призвал Иисуса Наввина и рек пред всем израилем [642]: мужествуй и укрепися, ты бо внидешь пред людми израилевыми в землю, ею же клятся Бог отцем нашим дати ея им, и Господь пойдет с тобою и не оставит тебе, не опустит, не бойся и не страшися. Тако же ближен был к смерти Аарон пред всем израилем: мужествуй, укрепися, ты бо един перед людми израилевыми в земли, ею же клятся Бог отцем нашим дати ея им, Господь пойдет с тобою и не оставит тебе, не опустит, не бойся и не страшися. Тако же ближен был к смерти Аарон [643]: указал Бог, чтоб приоблекся сын его Елиазар всем архиерейским облачением отца своего и совершает в книгах Числа; и умре Аарон на верху горы; и низшел Моисей и Елиазар з горы и виде вся сонмища, а то уже Бог не повелевает, чтоб люд был без пастыря; такожде и Христос по вознесении Своем оставил апостол святых, которыя б владели Церковию Божиею, чтоб не нарицалася: овдовела без архиерея и пастыря.

РАЗОРЕНИЕ 19 ВОПРОСА И ОТВЕТА

Глаголеши, совопросниче, яко Никон никого не оставил на своем месте, кто б на его месте чинствовал.