Никон - ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы

• Название: ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы
• Автор: Никон
• Жанр: Религия

---

Толкование.

Зде являет, яко ни сам той Сын хощет оставляти согрешения человеком, аще мы не прежде оставим. Тогда, рече, оставит Отец ваш небесный.

Евангелие: Аще ли же не оставит человеком согрешения их, ни Отец ваш небесный оставит вам согрешения ваша.

Толкование.

Ничто же бо тако ненавидит Бог, якоже сердце немилостиво и суровство (л. 736 об.) [3104] звериное, еже убивати и мучити брата своего. Зверско бо, еже любовь по разуму не имети и не миловати братию свою, братия бо есмы, якоже являет вышереченое слово, оставит и вам Отец ваш небесный, назнамена котораго Отца чада, не иже от по плоти рождьшаго отца коегождо, но Отца вашего небеснаго, яко да усрамимся чада, имея Отца небеснаго, тем же и о Себе глаголет яко: Не ищу волю Мою, но волю пославшаго Мя. И паки: Не могу Аз о себе творити ничесо же. И ко июдеом глаголет: Аминь [3105], аминь глаголю вам, не может Сын о себе творити ничесо же, (л. 737) [3106] аще не еже видит Отца творяща, яже бо Он творит, сия и Сын такожде творит. Отец бо любит Сына, вся [3107] показует Ему.

И паки инде рече [3108]: Аз, еже видех у Отца Моего, глаголю, и вы, убо еже видесте у отца вашего, творите. Отвещаша и речаша Ему: Отец наш Авраам есть. Глагола им Иисус: Аще чада Авраамля бысте были, дела Авраамля бысте творили. Ныне же ищете Мене убити, человека иже истину, вам глаголах, еже слышах от Бога. Сего Авраам несть сотворил, вы творите отца вашего. Реша же Ему: Мы от любодеяния несмы рождени, единаго Отца имамы Бога.

(л. 737 об.) [3109] Толкование.

Господь убо отца им написует диявола, не бо по достоянию, но от дел их видит. Они же выспрь идолу Авраама приносят. Часто же Господь убийственое их поминает произволение, ищете бо Мене, рече, убити и соглашаете на Мя. Како убо Онаго сынове есть, занеже Отчих дел не имате, о сродствии хвалитеся. Должни убо есте, аще хощете поистине Онаго чада именоватися и добродетелем подобитися. Они же паки рекоша: Мы от любодеяния несмы рождени, единаго Отца имамы Бога.

Виждь неразумнаго их кичения. Господь убо и Авраамля (л. 738) [3110] сродства изметается, они же тако гордят, якоже сыны себе Божия от неразумия своего сотворяют. Зане слышаша, первенец сын Мой Израиль. И сего ради хвалятся Божиим усыновлением. А достойно бе им слышати, еже Богу инде глаголющу пророком [3111]: Сыны родих и вознесох. Тии же Мене отвергошася.

Евангелие.

Паки [3112] рече им Иисус: Аще Бог Отец ваш бы был, любили убо бысте Мене. Аз бо от Бога изыдох и приидох, не о себе приидох, но Той Мя посла. Почто беседы Моея не разумеете, яко не можете слышати словесе Моего. Вы отца вашего диявола есте (л. 738 об.) [3113] и похоти отца вашего хощете творити. Он человекоубийца бе искони и во истине не стоит, яко несть истины в нем. Егда глаголет лжю, от своих глаголет, яко ложь есть и отец лжи. Аз же зане истину глаголю, не веруете Мене. Тем же на инем месте свидетельствует, глаголя [3114]: Аще Аз свидетельствую о Мне, свидетельство Мое несть истинно, ин есть свидетельствуяй о Мне, и вем, яко истино есть свидетельство Его, еже свидетельствует о Мне. Вы посласте ко Иоанну, и свидетельствова о истине, Аз не от человека свидетельства приемлю, но сия глаголю, да вы спасени будете. (л. 739) [3115] Аз же имам свидетельство боле Иоаннова. Дела бо, яже даст Мне Отец, да совершу я. Та дела, яже Аз творю, свидетельствуют о Мне, яко Отец Мя посла, и пославый Мя Отец, Той свидетельствова о Мне. Ни гласа Его нигде же слышасте, ни видения Его видесте и словесе Его не имате пребывающа в вас, зане Его же, Той посла, сему вы веру не емлете. Испытайте Писания, яко вы мните в них имети живот вечный, и та суть свидетельствующа о Мне. И не хощете приити ко Мне, да живот имате. Славы не приемлю, но разумех, яко любве Божия не имате в себе. Аз приидох во имя (л. 739 об.) [3116] Отца Моего и не приемлете Мене. Аще ин приидет во имя свое, того приемлете. Како вы можете веровати, славы друг от друга приемлюще, и славу, юже от единаго Бога не ищете. Не мните, яко на вы реку ко Отцу, есть иже нам глаголет Моисей, нань же вы уповаете [3117]. Аще бо бысте веровали Моисеови, веровали бысте убо и Мне, о Мне бо той писа. Аще ли того писанием не веруете, како Моим глаголом веру имете?

Толкование.

Зри, презориве, како Сын Божий и коликое свидетельство приводит, глаголя, яже Иоанна Крестителя и Моисея и пророки вся. Испытайте, рече, писания, (л. 740) [3118] и та суть свидетельствующа о Мне. Сего ради и от пророк поемлет первыя и славныя и великия, зане о Бозе и Отце велико непщевание имеша.

Таже дела о Бозе Отце соделаная боле пророческих гананий, таже и самаго того Бога Отца поставляет свидетеля и Святаго Духа свидетельствующа. И по сем сам Себе свидетеля и послуха неисписана и неложна вчиняет.

Ты же откуду сам о себе твориши свидетельство, яко подобает приити и законы новыя предавати, не сведомыя нам. От закона и пророк и святаго священнаго Евангелия и святых апостол и святых отец. Како же ты глаголеши: Отче наш, (л. 740 об.) [3119] иже еси на небеси. И прочее. Отчюждився своею злобою Его благодати, якоже и жиды. Ничто же сотворив достойно сыновства Божия, глаголаша: Мы от любодеяния несмы рождени, единаго отца имамы Бога. К ним же отрече Христос, глаголя. Евангелие: Аще [3120] Бог Отец ваш бы был, любили убо бысте Мене. Аз бо от Бога изыдох и приидох, не о Себе бо приидох, но Той Мя посла. Почто беседы Моея не разумеете, яко не можете слышати словесе Моего. Вы отца вашего диявола есте и похоти отца вашего хощете творити. Он человекоубийца бе искони и во истине не стоит, яко несть истины в нем. (л. 741) [3121] Егда глаголет лжю, от своих глаголет, яко ложь есть и отец лжи. Аз же зане истину глаголю, не веруете Мне.

Толкование.

Рек Господь к жидом, яко не можете слышати словесе Моего, таже наводит и вину. Почто не могут, рекше, не хотят? Зане рече: От отца своего вам се есть. Коего, глаголю, отца? Диявола. Вы бо Бога себе отца не разумеюще написуете, дела же вашего отца диявола вам послушествуют приснее. Того бо похоти хощете творити. И не рече же, дела, но похоти, являя, яко похотне зело прилежаху о лжи и убиийстве, еже есть свое дияволу. Он человекоубийца бе (л. 741 об.) [3122] искони, яко и вы ищете Мене убити. Оному уподобистеся, Адама убившему, он бо во истине не стоит, но лжи есть отец. И вы, лжуще на Мя, глаголете, яко несмь от Бога, и не стоите во истине, не пребываете в Моем слове, еже суть истина. Онаго чада есте, лжю рождьшаго, он бо и Бога к человеком оболга, к Еве рече, завидя вам, отрече вам древо, и к Богу паки человека оболга. Якоже и о Иове глаголя: Еда туне Иов чтет Бога, егда бо глаголет, от своих глаголет, человецы бо любящии лжю, яко чюжду лжю имут. Диявол же яко свою глаголет, лжа бо его есть исчадие и сам есть в тесноту ложь (л. 742) [3123] и отец лжи. Рече бо и о Еве, яко в онь же день аще снеста, будита яко бози, она же паче смерть объемля ста. Аз же, рече, яко истину глаголю и не веруете Ми. Ничто же бо инаго ищуще поимати Ми, разве едино, еже глаголати Ми истину. Сего ради совещесте на Мя, яко сынове отца вашего диавола. Аз же не от самого Себе глаголю, но еже видех от Отца Моего сия глаголю, и вы же, еже видесте от отца вашего, сия и творите. Аз убо, рече, Божия и небесная глаголю и Отца своего сих ради являю. Вы же своего отца, от них же делаесте и сообразуесте диавола всяко.

(л. 742 об.) [3124] И аще тако осуждаются жидове от Христа Бога за неверстие, еже не вероваша в Господа Бога и Спаса нашего Иисуса Христа сына, яко и сынови диаволи. Сынове же, разумей, беси, быти. А еже о муках тех сведетелствует сам Христос, глаголя: Тогда речет и сущим ошую Его: Идите от Мене, проклятии, во огнь вечный, уготованый диаволу и аггелом его. И паки. Тогда отвещает им, глаголя: Аминь, глаголю вам, понеже не сотвористе единому сих менших, ни Мне сотвористе и идут сии в муку вечную.

Толкование.

Сущих ошую Его во огнь посылает, еже уготовал есть диаволу и аггелом его, понеже немилостивни суть (л. 743) [3125] бесове и вражду многу имеют на нас. Достойно убо и таковой же муце предаеми бывают подобнии нравом бесовским, иже и своих ради дел прокляти быша.

Ты же, законопреступниче, не реку, яко отчасти, но всесовершенный отступниче, яко си ни блудницы, ни убийцы, ни похищницы суще в муки послани бывают. Но понеже не сотвориша ничто же по заподи [3126], того ради по правде таковии в муки вечныя идут. Якоже и Господь свидетельствует: Глаголю вам [3127], не вем вас, откуду весте. Отступите от Мене вси делателие неправде, ту будет плач и скрежет зубом.

И аще тако иже не увере жидом, неверства ради (л. 743 об.) [3128] таковыя муки приуготовашася, яко и отступником бесом. А иже отрекшися сатаны и всех дел его и всех аггел его и всего служение его и всея славы его и поплевав его, и сочетався Христу, и верова яко Царю и Богу, и елико святый Символ таинства в себе содержит исповеда, сими же паки сплетшеся побеждаеми бываю. Бывша [3129] ж им последняя горша первых. Лучши бо бе им не познати пути правды, нежели познавшим возвратитися от преданыя им святыя заповеди. Случи [3130] бо ся им истиная притча, пес возвращся на своя блевотину и свиния, омывшися в кале тине.